ماہنامہ عبقری - مئی 2011ء

انسان کے تین دوست علم‘ دولت اور عزت تینوں دوست تھے۔ ایک مرتبہ ان کے بچھڑنے کا وقت آگیا۔ علم نے کہا مجھے درسگاہوں میں تلاش کیا جاسکتا ہے۔ دولت کہنے لگی مجھے امراءاور بادشاہوں کے محلات میں تلاش کیاجاسکتا ہے۔ عزت خاموش رہی۔ علم اور دولت نے عزت سے اس کی خاموشی کی وجہ پوچھی تو عزت ٹھنڈی آہ بھرتے ہوئے کہنے لگی کہ جب میں کسی سے بچھڑ جاتی ہوں تو دوبارہ نہیںملتی۔ دل چار قسم کے ہوتے ہیں مسند احمد میں ہے رسول اللہ صلی اللہ علیہ وسلم نے فرمایا کہ دل چار قسم کے ہیں۔ ایک تو صاف دل جو روشن چراغ کی طرح چمک رہا ہو۔ دوسرے وہ دل جو غلاف آلود ہیں۔ تیسرا وہ دل جو الٹے ہیں۔ چوتھا وہ دل جو مخلوط ہیں۔ پہلا دل تو مومن کا ہے جو پوری طرح نورانی ہے۔ دوسرا دل کافر کا دل ہے جس پر پردے پڑے ہوئے ہیں۔ تیسرا دل منافق ہے جو جانتا ہے اور انکار کرتا ہے۔ چوتھا دل اس منافق کا ہے جس میں ایمان اور نفاق دونوں جمع ہیں۔ ایمان کی مثال اس سبزے کی طرح ہے جو پاکیزہ پانی سے بڑھ رہا ہو اور نفاق کی مثال پھوڑے کی طرح ہے جس میں پیپ اور خون بڑھتا ہی جاتا ہے اب جو مادہ بڑھ جائے وہ دوسرے پر غالب آجاتا ہے۔ (تفسیرا بن کثیر) آسان حساب حضرت عائشہ صدیقہ رضی اللہ عنہا سے روایت ہے کہ میں نے بعض نمازوں میں رسول اللہ صلی اللہ علیہ وسلم کو یہ دعا کرتے سنا:۔ اَللّٰھُمَّ حَاسِبنِی حِسَاباً یَّسِیراً ”اے اللہ! میرا حساب آسان فرما!“ میں نے عرض کیا حضور صلی اللہ علیہ وسلم آسان حساب کا کیا مطلب ہے؟ آپ صلی اللہ علیہ وسلم نے فرمایا آسان حساب یہ ہے کہ بندہ کے اعمال نامہ پر نظر ڈالی جائے اور اس سے درگزر کردیا جائے۔ (یعنی کوئی پوچھ گچھ اور جرح نہ کی جائے) بات یہ ہے کہ جس کے حساب میں اس دن جرح کی جائیگی اے عائشہ! رضی اللہ عنہا (اس کی خیر نہیں) وہ ہلاک ہوجائیگا۔ (مسند احمد) ٭٭٭٭٭٭٭ پچھلا صفحہ